tvb.com

 
 
   
tvb.com
 
 

網誌日期:2011.10.06 (四) 12:00PM

正如監製德哥一開始講,《不速之約》係一套天馬行空、好多點子嘅劇,所以阿耀老早就相信,網上一定好多人討論佢,結果證實咗阿耀呢個諗法。邰風由人變魔鬼,再到魔鬼變一個識催眠嘅人,再拉返出嚟睇其實又真係有魔鬼嘅特質。變嚟變去,萬變其實都不離其宗,就係人同自己嘅心魔嘅交戰。

 

咁快就到咗尾聲,阿耀真係有啲唔捨得,大家記得聽晚坐定定喺電視機前面,睇連播兩集嘅大結局啦。

 

最後,阿耀手頭上仲有啲花絮相,而家一次過放出嚟,放畀大家啦。

 

網誌日期:2011.10.05 (三) 12:00PM

面對事實可怕,同心魔交戰更可怕,不過最可怕嘅,莫過於分唔清係事實定係心魔。

 

當客觀環境都話畀你知,你愛嘅人可能出賣咗你,你選擇信,抑或唔信?我諗好多朋友都遇過呢種情況。Dr.O曾經好愛芳芳,甚至為佢犧牲都在所不惜,但睇住愛人同第二個男人咁親密,甚至連芳芳肚中骨肉嘅經手人都有可疑,呢個時候,愛情真係可以衝破一切?

 

阿耀唔知,更加唔敢諗。如果係你,你會點?

 

網誌日期:2011.09.30 (五) 4:12PM

前兩集Dr.O發現咗邰風唔係魔鬼,只不過係扮魔鬼嚟嚇Dr.O,諗住報返當日Dr.O見死不救佢爸爸。呢集出咗街之後,無論阿耀身邊嘅朋友,抑或網上討論區啲網友,都問緊同一個問題:「究竟邰風係咪真係正常人」。

 

阿耀同監製德哥傾開,佢聽完個問題後哈哈大笑,話邰風既唔係魔鬼,又唔係普通人,咁究竟佢係啲咩呢?阿耀當然唔可以「穿橋」。只可以話,有啲網民真係好犀利,咁都估中咗。之但係,呢個雖然係幾特別嘅點子,但並唔係套劇嘅重點,佢重點係心魔點樣改變一個人,令佢做出自己都唔相信嘅嘢。

 

德哥最後仲話,Dr.O準備會陷入一個困局,一個由心魔造成嘅困局,竟然係啲乜,Dr.O又走唔走得出個困局,記得繼續睇《不速之約》喇!